Crime News

ಹಲ್ಲೆ ಪ್ರಕರಣ, ಕೊಲೆ ಯತ್ನ

ದಿನಾಂಕ 17/02/2020ರಂದು ಮಡಿಕೇರಿ ಬಳಿಯ ಮಕ್ಕಂದೂರು ಗ್ರಾಮದ ಮೇಘತ್ತಾಳು ನಿವಾಸಿಗಳಾದ ತಂಬುಕುತ್ತಿರ ಲೋಕಪ್ಪ ಮತ್ತು ಕುಶಾಲಪ್ಪ ಎಂಬವರು ಮಕ್ಕಂದೂರಿನಿಂದ ಮೇಘತ್ತಾಳು ಗ್ರಾಮದ ಅವರ ಮನೆಗೆ ನಡೆದುಕೊಂಡು ಹೋಗುತ್ತಿರುವಾಗ ಎದುರಿನಿಂದ ಭೀಮಯ್ಯ, ನಾಣಯ್ಯ, ಪೂವಣಿ, ಸೀತಮ್ಮ, ಬೈಮನ ಗಗನ್, ತಮ್ಮಯ್ಯ ಮತ್ತು ರಾಜ ಎಂಬವರುಗಳು ಮಾರಕಾಯುಧಗಳು ಮತ್ತು ದೊಣ್ಣೆಯನ್ನು ಹಿಡಿದುಕೊಂಡು ಬಂದು ಲೋಕಪ್ಪ ಮತ್ತು ಕುಶಾಲಪ್ಪರವರೊಂದಿಗೆ ಜಗಳವಾಡಿ ಕತ್ತಿಯಿಂದ ಕಡಿದು ದೊಣ್ಣೆಯಿಂದ ಹೊಡೆದು ಹಲ್ಲೆ ಮಾಡಿ ಕೊಲೆಯತ್ನ ಮಾಡಿರುವುದಾಗಿ ನೀಡಿದ ದೂರಿನ ಮೇರೆಗೆ ಮಡಿಕೇರಿ ಗ್ರಾಮಾಂತರ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

ಆನ್‌ಲೈನ್ ವಂಚನೆ

ಕುಶಾಲನಗರದ ಆದಿ ಶಂಕರಾಚಾರ್ಯ ಬಡಾವಣೆ ನಿವಾಸಿ ಪ್ರವೀಣ್‌ ಟಿ.ಎನ್‌. ಎಂಬವರ ಬ್ಯಾಂಕು ಖಾತೆಯಿಂದ ಯಾರೋ ಅಪರಿಚಿತರು ಅವರ ಅರಿವಿಗೆ ಬಾರದಂತೆ ದಿನಾಂಕ 04/02/2020 ರಿಂದ 05/02/2020ರ ನಡುವೆ ಹಂತ ಹಂತವಾಗಿ ಸುಮಾರು ರೂ. 20,000/- ಹಣವನ್ನು ತೆಗೆದು ಮೋಸ ಮಾಡಿರುವುದಾಗಿ ನೀಡಿದ ದೂರಿನ ಮೇರೆಗೆ ಮಡಿಕೇರಿಯ ಸಿಇಎನ್‌ ಠಾಣೆಯ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

ರಸ್ತೆ ಅಪಘಾತ, ವ್ಯಕ್ತಿ ಸಾವು

ದಿನಾಂಕ 16/02/2020ರಂದು ಶ್ರೀಮಂಗಲ ಬಳಿಯ ಟಿ.ಶೆಟ್ಟಿಗೇರಿ ನಿವಾಸಿ ಪಿ.ಯು.ಪ್ರದೀಶ್‌ ಎಂಬವರು ಅಲ್ಲಿನ ಕೊರಕೊಟ್ಟು ಅಯ್ಯಪ್ಪ ದೇವಸ್ಥಾನದ ಬಳಿ ನಡೆದುಕೊಂಡು ಹೋಗುತ್ತಿರುವಾಗ ಟಿ.ಶೆಟ್ಟಿಗೇರಿ ಕಡೆಯಿಂದ ಕೆ.ಬಾಡಗ ನಿವಾಸಿ ಪೆಮ್ಮಣಮಾಡ ಮಂದಣ್ಣ ಎಂಬವರು ಅವರ ಬೈಕನ್ನು ಅತಿ ವೇಗ ಮತ್ತು ಅಜಾಗರೂಕತೆಯಿಂದ ಚಾಲಿಸಿಕೊಂಡು ಬಂದು ಪ್ರದೀಶ್‌ರವರ ಮುಂದೆ ನಡೆದುಕೊಂಡು ಹೋಗುತ್ತಿದ್ದ ಮಣಿ ಎಂಬಾತ ಮತ್ತು ಆತನ ಜೊತೆಗೆ ಹೋಗುತ್ತಿದ್ದ ಒಂದು ಮಗುವಿಗೆ ಡಿಕ್ಕಿಪಡಿಸಿದ ಪರಿಣಾಮ ಗಾಯಗೊಂಡ ಇಬ್ಬರನ್ನೂ ಪ್ರದೀಶ್‌ರವರು ಆಸ್ಪತ್ರೆಗೆ ದಾಖಲಿಸಿದ್ದು ಆಸ್ಪತ್ರೆಯಲ್ಲಿ ಮಣಿರವರು ಮೃತರಾಗಿರುವುದಾಗಿ ನೀಡಿದ ದೂರಿನ ಮೇರೆಗೆ ಶ್ರೀಮಂಗಲ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

ಮನೆ ಕಳವು ಪ್ರಕರಣ

ದಿನಾಂಕ 17/02/2020ರಂದು ವಿರಾಜಪೇಟೆ ಬಳಿಯ ಅರಮೇರಿ ನಿವಾಸಿ ಹೆಚ್‌.ಆರ್.ಗೌರಮ್ಮ ಎಂಬವರು ಕೆಲಸಕ್ಕೆ ಹೋಗಿ ಮರಳಿ ಬಂದಾಗ ಯಾರೋ ಕಳ್ಳರು ಮನೆಗೆ ಪ್ರವೇಶಿಸಿ ಮನೆಯೊಳಗಿದ್ದ ಬೀರುವಿನ ಬಾಗಿಲನ್ನು ಮೀಟಿ ತೆರೆದು ಅದರೊಳಗಿದ್ದ ರೂ. 9,500/- ನಗರದು ಹಾಗೂ ರೂ.11,000/- ಮೌಲ್ಯದ ಚಿನ್ನಾಭರಣಗಳನ್ನು ಕಳವು ಮಾಡಿಕೊಂಡು ಹೋಗಿರುವುದಾಗಿ ನೀಡಿದ ದೂರಿನ ಮೇರೆಗೆ ವಿರಾಜಪೇಟೆ ಗ್ರಾಮಾಂತರ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

ಏಣಿಯಿಂದ ಬಿದ್ದು ಗಾಯ

ದಿನಾಂಕ 15/02/2020ರಂದು ಹುದಿಕೇರಿ ಬಳಿಯ ಕೋಣಗೇರಿ ನಿವಾಸಿ ಹೆಚ್‌.ಎಲ್. ವಸಂತ ಎಂಬವರು ಹುದಿಕೇರಿ ನಿವಾಸಿ ಕಿರಿಯಮಾಡ ಭೀಮಯ್ಯ ಎಂಬವರ ತೋಟದಲ್ಲಿ ಏಣಿ ಹತ್ತಿ ಕಾಳು ಮೆಣಸು ಕುಯ್ಯುತ್ತಿರುವಾಗ ವಸಂತರವರು ಏಣಿಯಿಂದ ಆಯತಪ್ಪ ಕೆಳಗೆ ಬಿದ್ದ ಪರಿಣಾಮ ತೀವ್ರವಾಗಿ ಗಾಯಗೊಂಡಿರುವುದಾಗಿ ನೀಡಿದ ದೂರಿನ ಮೇರೆಗೆ ಶ್ರೀಮಂಗಲ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

ಹಲ್ಲೆ ಪ್ರಕರಣ

ದಿನಾಂಕ 17/02/2020ರಂದು ಸೋಮವಾರಪೇಟೆ ಬಳಿಯ ಗರ್ವಾಲೆ ನಿವಾಸಿ ಹೆಚ್‌.ಬಿ.ಈರಪ್ಪ ಎಂಬವರ ಕಾರ್ಮಿಕ ಸೋಮೇಶ್‌ ಎಂಬವರು ತೋಟದಲ್ಲಿ ಕುಯ್ದ ಕಾಫಿಯನ್ನು ತಳ್ಳುಗಾಡಿಯಲ್ಲಿ ತುಂಬಿಸಿಕೊಂಡು ಈರಪ್ಪನವರ ಮನೆಗೆ ಸಾಗಿಸುತ್ತಿರುವಾಗ ಮನೆಯ ಬಳಿ ಈರಪ್ಪನವರ ತಮ್ಮ ಅಪ್ಪಾಜಿಯು ಆಡ್ಡಿಪಡಿಸಿದುದನ್ನು ಈರಪ್ಪನವರು ವಿಚಾರಿಸಿದ ಕಾರಣಕ್ಕೆ ಅಪ್ಪಾಜಿಯವರು ದೊಣ್ಣೆಯಿಂದ ಈರಪ್ಪನವರಿಗೆ ಹೊಡೆದು ಹಲ್ಲೆ ಮಾಡಿರುವುದುದಾಗಿ ನೀಡಿದ ದೂರಿನ ಮೇರೆಗೆ ಸೋಮವಾರಪೇಟೆ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

1 2 3 650